Mae Cyngor Sir Ceredigion wedi cwblhau cynllun i sefydlu llwybr cerdded sy'n ymestyn bob cam o Aberteifi, ym mhegwn deheuol Ceredigion, bob cam i'r Ynsylas yng ngogledd y sir. Derbyniodd gynllun Llwybr Arfordir Ceredigion nawdd o'r Undeb Ewropeaidd o dan raglen Amcan 1 Gorllewin Cymru a'r Cymoedd Cynulliad Cenedlaethol Cymru.

• PWYSIG:
  Er bod trywydd mewn defnydd sy'n cysylltu'r Mwnt ag Aberteifi (sylwch ar dudalen 'Y Llwybrau') - nodwch nad yw'r trywydd go iawn mewn defnydd oherwydd achos cyfreithiol.

CYSYLLTU'R TLYSAU...

Mae Llwybr Arfordir Ceredigion yn creu cyswllt rhwng llu o adnoddau amgylcheddol, naturiol a hanesyddol un o'r rhannau prydferthaf o arfordir Cymru:

• Ardal Cadwraeth Arbennig yr Afon Teifi gan gynnwys Gwarchodfa Natur Genedlaethol Glannau'r Teifi a Chanolfan Bywyd Gwyllt Cymru yng Nghilgerran;

• Y traeth a'r arfordir o gwmpas y Mwnt sydd o dan reolaeth yr Ymddiriedolaeth Genedlaethol, gydag eglwys hanesyddol y Drindod gerllaw;

• Ardal Cadwraeth Arbennig Bae Ceredigion ac Arfordir Treftadaeth Morol Ceredigion sy'n fyd enwog am eu dolffiniaid, llamidyddion a morfilod;

• Traethau gwobrwyedig pentrefi glanmôr prydferth Aberporth; Tresaith a Llangrannog;

• Tiroedd ysblennydd yr Ymddiriedolaeth Genedlaethol yn nhraeth Penbryn, yng Nghwmtydu ac ar Ynys Lochtyn;

• Y Cei Newydd a'r Cei Bach gerllaw - sy'n enwog am eu cysylltiadau â Dylan Thomas arferai fyw ac ysgrifennu yn y fro;

• Aberaeron - ble mae un adeilad ymhob pedwar wedi ei restru fel un sydd o arwyddocâd pensaerniol neu hanesyddol arbennig. Mae llwybr troed a beicio yn arwain o Aberaeron i gyfeiriad eiddo'r Ymddiriedolaeth Genedlaethol yn Llanerchaeron;

• Pentrefi arfordirol croesawgar tebyg i Aberarth, Llanon, Llansantffraid a Llanrhystud;

• Aberystwyth - cartref coleg cyntaf Prifysgol Cymru ac, wrth gwrs, Llyfrgell Genedlaethol Cymru. Aberystwyth yw'r dref fwyaf ar arfordir gorllewinol Cymru;

• Gwarchodfa Natur Genedlaethol Aber yr afon Dyfi yn yr Ynyslas, ger y Borth, a'r unig ardal BIOSFFER yng Nghymru.

LLYFR CANLLAW - LLWYBR ARFORDIR CEREDIGION

Mae'r llyfr canllaw dwyieithog, 240 tudalen llawn lliw, ar gael drwy'r post oddi wrth Wasanaeth Twristiaeth Ceredigion.

Cewch fanylion llawn am y gwasanaeth archebu llyfrau drwy'r post - ynghyd â ffeiliau PDF yn disgrifio'r llyfrau ac yn cynnig ffurflen archeb - ar dudalen cerdded prif wefan twristiaeth Ceredigion.

Y CYNLLUN "CAB-A-BAG"

Dyfeisiwyd cynllun Cab-a-Bag i gynorthwyo pobl sydd am gerdded Llwybr Arfordir Ceredigion ond nad ydynt am gario bagiau trwm o le i le bob dydd. Beth sy’n haws na bwcio Cab o blith rhestr o gwmnïau tacsi a threfnu i’ch Bag gael ei gasglu a’i drosglwyddo i’r llety nesaf?

Pe byddech am gyrraedd Ceredigion trwy ddefnydd trafnidiaeth gyhoeddus, medrech ddefnyddio’r cynllun Cab-a-Bag i drefnu bod tacsi yn eich casglu o’r bws neu’r trên ar ôl i chi gyrraedd ac yn eich cludo i lety ar gyfer eich arhosiad noson gyntaf. Medrech drefnu ymlaen llaw fod tacsi yn cludo’ch bagiau o le i le o ddydd i ddydd tan i chi gerdded y llwybr cyfan!

Mae pob uned llety sydd ar gynnig o dan y cynllun hwn wedi ei archwilio yn unol â safonau gwasanaeth Croeso Cymru'r Cynulliad Cenedlaethol ac yn cydymffurfio â gofynion y cynllun “Croeso i Gerddwyr”.

Mae pob un o gwmnïau tacsi cynllun Cab-a-Bag wedi eu trwyddedu gan Gyngor Sir Ceredigion.

Cewch mwy o fanylion am y cynllun Cab-a-Bag yn y daflen PDF hon.

Mae cynllun Cab-a-Bag wedi derbyn cyllid gan Gynllun Datblygu Gwledig Cymru 2007-2013 a ariennir yn ei dro gan Lywodraeth Cynulliad Cymru a Chronfa Amaethyddol Ewrop ar gyfer Datblygu Gwledig.

---

Nodwch fod y broses o godi arwyddbyst o'r newydd mewn nifer o fannau ar Lwybr yr Arfordir yn digwydd ar hyn o bryd. Gall fod anmbell i ddarn ble nad yw'r gwaith wedi ei gwblhau eto.